ساعات أقوم الصبح، قلبي حزين
أطل برا الباب، ياخذني الحنين
اللي اشتريتو انباع، واللي لقيته ضاع
واللي قابلتو راح، وفات الأنين
وأرجع وأقول:
لسه الطيور بتحن والنحليات بتطن والطفل ضحكو يرن
مع إن مش كل البشر فرحانين
***
حبيبي سكر مر طعم الهوى
فرق ما بينا البين، ما عدناش سوا
حرام عليك يا عذاب، نبقى كده أغراب
دا البعد جرح من غير دوا
وأرجع وأقول:
لسه الطيور بتحن والنحليات بتطن والطفل ضحكو يرن
مع إن مش كل البشر فرحانين
***
أدي اللي كان وأدي القدر وأدي المصير
نودع الماضي وحلمه الكبير
نودع الأفراح نودع الأشجان
راح اللي راح ومعدش فاضل كتير
وأرجع وأقول:
لسه الطيور بتحن والنحليات بتطن والطفل ضحكو يرن
مع إن مش كل البشر فرحانين
****
إيه العمل دلوقتي يا صديق
غير إننا عند افتراق الطريق
نبص قدمنا على شمس أحلامنا
نلقاها بتشق السحاب العميق
وأرجع وأقول:
لسه الطيور بتحن والنحليات بتطن والطفل ضحكو يرن
مع إن مش كل البشر فرحانين
هناك 3 تعليقات:
بحبها جدا
بحسها بتاعتي ,, معمولة عشاني مخصوص
أنا كمان بحبها جدًا جدًا، وعندي نفس إحساسك، بيتهيألي إني كنت الطفلة الوحيدة اللي بتحب أغنية زيّ دي. دلوقتي لقيتها قريبة مني قوي... صلاح جاهين ده عبقري الله يرحمه.
صباحك ياسمين ولقا بغير فراق :)
ينفع احبها انا كمان
:))))))ونبقى تلاتة
إرسال تعليق